Ég hef verið að fikra mig áfram í jurtaostagerð í smá tíma núna. Mér finnst alltaf mun betra að búa þá til sjálf heldur en að kaupa út í búð því þá get ég alfarið stjórnað bragðinu og áferðinni.
Uppáhalds heimagerði osturinn minn er úr kasjúhnetum en sá ég fyrst svipaða uppskrift inná maedgurnar.is. Eftir að hafa séð uppskriftina þar fór ég sjálf að fikta og prufa mig áfram og í eitt skiptið tókst mér að gera kasjúost sem bragðaðist smá eins og gráðostur.
Nú er mjög langt síðan ég smakkaði gráðost en í minningunni virtist þetta komast mjög nálægt honum 🙂
Hráefni:
2 dl kasjúhnetur lagðar í bleyti í 1-2 klukkustundir
1 msk sítrónusafi
2 msk kókosolía
3 msk næringager
1 tsk basilikukrydd
1/2 tsk smoked paprika
1/4 tsk salt
5-7 dropar tabasco
1 msk vatn
Aðferð:
Hellið vatninu frá kasjúhnetunum, skolið og setjið hneturnar í matvinnsluvélina ásamt kókosolíunni.
Blandið í smá stund og bætið síðan við restina af hráefnunum.
Blandið vel og vandlega og skrapið hliðarnar í skálinni svo ekkert fari til spillis og allt blandist jafnt.
Þegar blandan er orðin mjúk þá finnið þið form, setjið ostinn í formið og skellið inn í ískáp í smá tíma. Þá harðnar osturinn og verður aðeins þéttari.
The Broke Vegans 